Սամվել Մարգարյանի ստեղծագործությունների հասարակական քննարկում
Շիրակի մարզային գրադարանում կայացավ բանաստեղծ, «Շիրակ» հանդեսի գլխավոր խմբագիր Սամվել Մարգարյանի «Մատյան երջանկության․ տիեզերքի 7 հրաշալիքները» գրքի հասարակական քննարկումը:
Միջոցառմանը ներկա էին Շիրակի մարզի գիտության ,կրթության, մշակույթի բնագավառների ներկայացուցիչներ, գրքասերներ, ուսանողներ և աշակերտներ: Իրենց ելույթներում գրքի գաղափարական հարուստ բովանդակությունը, գեղարվեստական առանձնահատկությունները արժևորեցին և բարձր գնահատեցին արվեստագետներ Մարինե Խաչատրյանը, ակադեմիկոս Սերգեյ Նազարեթյանը, բանաստեղծներ Ստեփան Միքայելյանը, Արա Գևորգյանը, արձակագիր Շնորհիկ Շահինյանը, անվանի քանդակագործ Սամվել Պետրոսյանը , բանաստեղծի մանկության ընկերը`Արշակ Ղազարյանը:
Միջոցառմանը իրենց ասմունքով հանդես եկան Երազգավորս գյուղի դպրոցի աշակերտները տնօրենի ուղեկցությամբ, ով բարձր է գնահատում գրողի սերը դեպի հայրենի հողը, ընտանիքը և համամարդկային արժեքները:
Գրքից ընտրված բանաստեղծություններից ասմունքեցին «Ֆոտոն» վարժարանի աշակերտները: Իրենց երաժշտական ողջույնը մատուցեցին «Վարդուհի» արվեստի դպրոցի շնորհաշատ սաները: Ցուցադրվեցին կադրեր «Ֆիլմ Սամվել Մարգարյանի մասին» վավերագրական կինոնկարից:
Իրենց տպավորություններով կիսվեցին նաև գրադարանի տնօրեն` Սեդա Գևորգյանը և տնօրենի տեղակալ` Նազմինե Բաղդասարյանը:
Հանդիպման ավարտին իր շնորհակալական խոսքում գրքի հեղինակը մասնավորապես նշեց. «Շուտով կավարտվի գրքիս անգլերեն թարգմանությունը: Որոշել եմ իմ գրքով մասնակցել միջազգային մեծ մրցանակաբաշխության,հաջողության հասնելու դեպքում մրցանակային գումարը տրամադրելու եմ հայրենի գյուղում եկեղեցու կառուցմանը (հիմքը արդեն կառուցել ենք)»։
Հանդիպումը վարում էր Գրադարանի ընթերցարանի և միջոցառումների կազմակերպման բաժնի վարիչ` Անի Արշակյանը:
